Coa chegada a Galicia de Salvador Massó Palau
no inicio do século XIX comezou co salgado do peixe un proxecto
industrial que posteriormente daría paso a empresa Hermanos Massó,
que foi a conserveira galega máis importante e que chegou a ter
coa fábrica de Cangas en 1941 a máis importante de Europa.
José María Massó (1899-1981), posteriormente
propietario xunto co seu irmán Gaspar da firma Hermanos Massó,
foi un afeccionado á fotografía que tirou fotografías
de forma constante ao longo da súa vida. Dende comezos dos
anos vinte coas imaxes tomadas en África coincidindo coa guerra,
de formato medio, ata as reportaxes realizadas en diapositivas 6 x
6 a cor nos últimos anos da súa vida. Durante a década
dos vinte realiza gran número de fotografías de grande
interese, en formatos 6 x 9 e 9 x 12. A través da fotografía
dá conta das súas viaxes por Europa, dos acontecementos
familiares, realiza retratos de amigos e parentes e, sobre todo, fotografa
as actividades lúdicas que organizaban, as excursións
de caza, as viaxes en piragua, a praia... Estas fotos son particularmente
interesantes dende un punto de vista fotográficos e amosan
interesanes aspectos da sociedade dos anos vinte que nos traen ao
recordo as imaxes da Belle epoque doutros países, como as que
realizou Jaques-Henri Lartigue.
O interese que José María Massó tivo durante
toda a súa vida por todo o relacionado co mar, levouno a realizar
gran número de fotografías sobre o mundo da pesca, cunha
visión etnográfica (estaleiros, aparello, velas... ),
así como outras de diferentes elementos como palangres, que
hoxe xa están completamente desaparecidos.
Esta empresa coidou especialmente a difusión publicitaria
dos seus produtos, realizando coidados catálogos tanto en español
como en francés, como o realizado no ano 1924 para o que se
encargou unha interesantísima reportaxe fotográfica
sobre todo o proceso industrial da conserva que tiña lugar
na fábrica vella de Bueu. Posteriomente, coa apertura da nova
fábrica de Bueu realiza outra reportaxe nas novas instalacións,
como tamén o faría cando constrúen a nova fábrica
de Cangas, que vai ser a máis importante do grupo. Na actualide
consérvase no Arquivo fotógráfico de José
María Massó un importante número de placas, ademais
de copias de época sobre a salgadura do peixe e o proceso industrial
da conserva, así como outras relativas ao mundo da pesca en
xeral, realizadas por diferentes fotógrafos profesionais como
Barreiro, Pacheco, Sarabia ou Ocaña.
| Manuel Sendón |
| Xosé Luis Suárez Canal |
